ismag

نصائح ستغير حياتك الدراسية

Younes JD

عضو جديد
#المنشور_الذهبي
كنتمنى أن هاد لبوسط لي غنكتب يعاونكم واخا طويل شوية.. حيت حنا ملقيناش فعهدنا شي حد يوجهنا بحال هكا.
نتا ولا نتي غتدخل لبتس BTS هاد لعام ولا كملت عامك اللول فيها و عانيت من شي حوايج ؟؟؟ ركز(ي) معايا :
العقلية : أول حاجة هي عقليتك لي غدخل بيها للقراية من بعد لباك ,كون متأكد أنه كلشي غادي يتبدل , كيفاش ؟ , التعامل مع لقراية فبتس خاسو يكون ذكي يعني متقراش غي باش تدوز فرض ولا امتحان ولا تدي الديبلوم ! خاسك من أول حصة تدخلها تسخر عقلك كااامل فالتركيز علا : شنو كيتقال, شنو كيتكتب و كدايرة طريقة الخدمة ديال الاستاذ.
الأدوات : دفاتر كبار ولا روجيسترات يكون ورقهم بيض بزاف حيت كيعطيوك رغبة فانك تكتب.. و تخدم.. + أجوندا وحدة كدير فيها أهم العبر و الحكم ههه لي كيقولهم الاستاذ ديال أي مادة كانت ( هادشي غيعاونك فالتعبير فوسط الفروض و الامتحانات انسجاما مع طريقة الاستاذ ) .
التحضير للفروض : قبل مكيبدا لعام كتحدد أدنى نقطة خاسك تجيب, مثلا 15 فكل فرض و هدشي اوتوماتيكيا كيعطيك كتر من 15 فالنتيجة النهائية + ايلا كنتي كل حصة كتسخر فيها عقلك بنسبة 90 فلمية تركيز , تيق بيا غادي تمشي تدوز لفرض بلا مراجعة و تجيب 15 ديالك فأي مادة كانت .
الامتحان ( باساج) : هو امتحان ولوج كيديروه اساتذة المركز, كيفاش توجدلو ؟ , بكترة ما كتركز فالقسم بزاف غتحس براسك عامر و لكن مخاسكش تتغر و متوجدش.. , التحضير كيكون عن طريق التلخيص ديال الدروس + الفروض لي كنتو كديرو تعاود تخدمهم " ضروري " لحقاش فاش دخل للامتحان غتلقا دكشي تدربتي عليه . ( لي منجحش فهاد الامتحان كيتطرد من الشعبة)
الامتحان ( الوطني) : امتحان على صعيد المغرب كديرو لجنة وطنية مكونة من أساتذة مختلفين, كيفاش توجدلو ؟ , ( هاد الامتحان كيعتمد علا مقرر السنتين ) , ايلا تبعتي دكشي لي قلت لفوق, غتجيب غي التلخيصات ديالك + لخدمة دلعام الثاني و غتكون مزيان , خاسك تخدم الامتحانات السابقة بزاف, حيت فاش غتدخل تدوز غتصدم بلي نفس لحوايج كيتعاودو خاسك غي تكون خدمت من قبل.
الحياة الشخصية : كون سباق انك تدير لخير نتا اللول فالناس لي معاك حيت دكشي كيرجعولك ربي من بعد باش يعاونك و استغل حياتك داخل لبتس لأنك غتوحشها من بعد و متلقاش بحالها + لي وقف عليك فشي حاجة مدوزوش و شرحلو حيت هكا كتعاود تلسق معلوماتك فالدماغ ( قبل الفرض طبعا
:) ) .
السكن للناس لي بعاد : البنات لي غيديرو لانتيرنا ولا الدراري لي غيكريو , هادي تجربة من أجمل ما يكون تتعلم فيها بزاف دلحوايج و مكيهمش ايلا بقيت شي نهار ولا يوماين ولا سيمانة بجوع ولا تسهر الليالي.. , كلشي غادي يدوز و يبقا غي نجاحك ✨.
الصلاة و الصوم : ايلا عطيت لربك دكشي لي كيطلب منك غادي يعطيك بلا متطلب منو, متركوش الصلاة و ايلا قديتو بداو عامكم بصيام ديال تنين و لخميس و خليوها عادة.. ( واخا يجي الامتحان فرمضان و الحرارة غتقدو عليه عااادي).
مكتب الطلبة : من حق كل مركز يأسس مكتب طلبة ديالو يدير فيه الانشطة الثقافية الفنية الرياضية... و كيبقا نقطة راسخة فالمسار الشخصي و الدراسي و المهني ديالك + هاد لمكتب تدار باش يكون الناطق الوحيد باسم الطلبة و ينظم الانشطة + احترم الناس لي غادي تدخل فيه حيت فآخر المطاف كيبقاو طلبة بحالك بحالهم سخرو جزء من وقتهم لخدمة مصلحتك.
ما بعد الديبلوم : حضيو مع الدفيع للاجازات لي كيبدا فشهر يونيو و دفعو لاي حاجة بانتلكم مزيانة للمسار ديالكم باش تلقاو اختيارات متعددة + عاون خوتك لي لقاو صعوبة فالدفيع و اي مشكل حطوه فالمجموعة حنا هنا رهن اشارتكم طبعا + غتبريباري قبل الكونكور بدكشي لي غادي تقرا فداك ليسونس و دكشي لي عندك من قبل فبتس كيخص داك الدومين .
ب. س : سكريني المنشور و حطو فمجموعة (فيس ولا واتساب) قسمك الجديد باش كلشي يستافد (مع ذكر المصدر احتراما للمجهود)
بقلم : يونس جدي (Younes_JD@)
 
أعلى